Dagaallo lagu naafeeyay ciidammada gumaysiga
Dadwayne lagu xidhxidhay meelo kala duwan
Qaramada Midoobay oo ka walaacsan xaaladda Kenya
Barnaamijkii Aragtida Halgamaaga (Shirqoolada Gumaysiga iyo midkii ugu dambeeyey ).

Dagaallo lagu naafeeyay ciidammada gumaysiga

Wariyaha RX uga soo warrama dalka Ogaadeenya ayaa noo soo sheegay dagaallo badan oo si wayn loogu naafeeyay ciidammada naf la-caariga ah ee gumaysiga Itoobiya. Dagaalladaasi waxay u dheceen sidatan;

Shalay oo taariikhdu ahayd 11/02/08 dagaal ka dhacay Heella-dheere, oo Garbo ka tirsan, waxaa ciidammada gumaysiga lagaga dilay 6 askari, 2 kalana waa lagaga dhaawacay.

09/02/08 dagaal adag oo isaguna ka dhacay La-helow, oo ka tirsan degmada Dhuxun, waxaa ciidammada gumaysiga lagaga dilay 13 askari, waxaa sidoo kale lagaga dhaawacay 7 askari.

07/02/08 waxaa weerar mir ah loo gaystay ciidammada gumaysiga eek u sugan Gabagabo, kuwaasoo la gaadhsiiyay khasaare aan faahfaahintiisa la haynin.

06/02/08 dagaal ka dhacay Cali-sancad, oo ka tirsan degmada Sagag, waxaa ciidammada gumaysiga lagaga dilay 6 askari, 7 kalana waa lagaga dhaawacay.

05/02/08 weerar mir ah oo lagu qaaday ciidammada gumaysiga eek u sugan magaalada Sagag, waxaa inta la ogyahay lagaga dilay 6 askari, 5 kalana waa lagaga dhaawacay.

04/02/08 waxaa weerar mir ah loo gaystay ciidammo gumaysigu leeyahay oo hawlgal u tegay Qarjajabo, oo degmada Dhuxun ka tirsan, waxaana la gaadhsiiyay khasaare aan faahfaahintiisa la haynin.

Dadwayne lagu xidhxidhay meelo kala duwan

Ciidammada nacabka ah ee gumaysiga Itoobiya ayaa meelo kala duwan oo Ogaadeenya ka mid ah ku xidhxidhay dadwayne rayad ah, kuwa kalana dhibaatooyin kale u gaystay.

09/02/08 La-helow, oo Dhuxun ka tirsan, waxay ciidammada gumaysigu ku dileen nin shacab ah oo lagu magacaabo Shariif Maxamuud Shariif Xasan. Waxay sidoo kale la tageen oo meel ay geeyeen aan la ogayn dadka kala ah;
1- Axmed-nuur Macalin Muxumed iyo
2- Ina Cabdi Maxamuud oo magaciisa hore aanaan haynin.
Ciidammada gumaysigu waxay sidoo kale 1000 Bir ka dhaceen gabadha lagu magacaabo Luul Cabdi Sheekh.

07/02/08 tuulada Shinniile, oo ka tirsan degmada Dhanaan, waxay ciidammada gumaysigu ku xidhxidheen dadka kala ah;
1- Maxamuud Faarax Cismaan
2- Leexeeye Xarbi Afey
3- Xasan Burqa-yar Maxamuud Daahir iyo
4- Maxamed Axmed Cismaan

Isla 07/02/08 magaalada Sagag waxay ciidammada gumaysigu ku xidhxidheen niman culimo ah oo lagu kala magacaabo;
1- Sh Cabdi Maalik Aw Xasan iyo
2- Sh Cali Muxumed Madar oo 80 jir ah

05/02/08 waxay ciidammada gumaysigu magaalada Yucub ku xidhxidheen dadka kala ah;
1- Xasan Xaashi Dubbad iyo
2- Hurre Deeq Dhoobey

Isla 05/02/08 waxay ciidammada gumaysigu magaalada Garbo ku xidhxidheen dadka kala ah;
1- Siyaad Axmed Wali
2- Cabdi-dhagax Macalin Axmed
3- Xaliimo-tiriig oo magaceeda oo buuxa aanaan haynin iyo
4- Maryan oo iyadana magaceeda oo buuxa aanaan haynin

22/01/08 waxay ciidammada gumaysigu magaalada Dhagaxbuur ku xidhxidheen dadka kala ah;
1- Daahir Cumar Axmed
2- Cabdi Maxamuud Aw Cumar
3- Cabdi Siyaad iyo
4- Dool Cali Gar-daran

Dhinaca kale markii ay taariikhdu ahayd 08/02/08 waxay ciidammada gumaysigu Aqalladoodii ka gubeen dadka kala ah;
1- Aaden Xirsi oo ay 2 Aqal ka gubeen
2- Cadoowe Aaden Xirsi oo ay 1 Aqal ka gubeen
3- Cawil Aaden Xirsi oo ay isagana 1 Aqal ka gubeen iyo
4- Cabdi-wali Aaden Xirsi oo isagana ay 1 Aqal ka gubeen

Qaramada Midoobay oo ka walaacsan xaaladda Kenya

Qaramada Midoobay ayaa rumaysan in dad gaadhaya 600,000 oo qof oo reer Kenya ah ku bara-kaceen qulqulatooyinkii ka dhacay dalka Kenya intii ka denbaysay doorashooyinkii madaxtinimada ee la isku af-dhaafay.

Madaxa waaxada gargaarka degdegga ah ee Qaramada Midoobay John Holmes, oo dhawaan booqday xeryo ay ku sugan yihiin dadka giryohooda laga soo bara-kiciyay ee dalka Kenya, ayaa sheegay in qiyaastii 300,000 oo dadka bara-kacay ahi ay ku nool yihiin xeryo loo ooday, tiro intaasoo kal e ahna ay la nool yihiin eheladooda ama qaraabadooda.

John Homes ayaa ka soo noqday booqasho seddex maalmood qaadatay oo ku tegay dalka Kenya, taasoo uu ugu kuur-galayay xaaladda Kenya, murankii doorashada ka dib. John Holmes wuxuu booqday xeryo dadka lagu ururiyo oo ku yaalla Galbeedka Rift Valley, oo ah meelaha ugu daran ee ay ka dhaceen dagaallada ka dhashay murankii doorashada.

Qaramada Midoobay waxay hadda ka hor deeq bixiyayaasha caalamiga ah ka codsatay deeq gaadhaysa 42 milyan oo doollarka Maraykanka ah, hase yeeshee Holmes ayaa sheegay in qiyaastii kala badh ka mid ah qaddarkii deeqdii ay codsadeen ay soo gaadhay.

Wadaxaajood lagu baadidi goobayo xal siyaasadeed ayaa in muddo ahba u socday dowlada iyo mucaaradka Kenya, kuwaasoo uu dhexdhexaadinayo xoghayihii hore ee Qaramada Midoobay Kofi Annan.

Kofi Annan ayaa sheegay inuu aad ugu kalsoon yahay in labada dhinac ay heshiis kama denbays ah isla gaadheen toddobaadkan gudihiisa.

12 February 2008

Axmed Gaal-Eri

Radioxorio@radioxoriyo.com
Raadioxoriyo@yahoo.com

Radio Xoriyo waxaad ka dhegaysan kartaa Mawjadda 41 MB ee dhererkeedu yahay 9445 KHZ, iyo internetka http://Radioxoriyo.com iyo http://Ogaden.com Maalinta Talaadada ah 7:00PM - 8:00PM waqtiga Afrikada Bari