|
Dagaallo lagu naafeeyay ciidammada gumaysiga
Dagaallo dhawr ah maalmihii u denbeeyay
dhex-maray CWXO iyo kuwa gumaysiga Itoobiya
ayaa dhibaatooyin kala duwan loogu gaystay
ciidammada gumaysiga Itoobiya, sidaasna
waxaa noo soo tabiyay wariyaha nooga soo
warrama dalka Ogaadeenya. Dagaalladaasi
waxay u dhaceen sidatan;
23/08/08 dagaal isaguna ka dhacay
Dheeh-wayne, oo La-helow ka tirsan, waxaa
gumaysiga lagaga dilay 2 askari, 6 kalana
waa lagaga dhaawacay.
21/08/08 dagaal isaguna ka dhacay meesha
lagu magacaabo Kurdaale, waxaa ciidammada
gumaysiga lagaga dilay 2 askari, 3 kalana
waa lagaga dhaawacay.
20/08/08 dagaal ka dhacay Diidu, oo
Sallaxaad ka tirsan, waxaa gumaysiga lagaga
dilay 2 askari, 3 kalana waa lagaga
dhaawacay.
19/08/08 cutub ka tirsan CWXO ayaa weerar
mir ah ku qaaday ciidammada gumaysiga ee ku
sugna Laga-hidda, waxayna gaadhsiiyeen
khasaare aan faahfaahintiisa la haynin.
Madaxda JWXO oo dhambaal hanbalyo ah u
diray dadwaynaha Ogaadeenya
Guddoomiyaha Jabhadda Waddaniga Xoreynta
Ogaadeenya JWXO Admiraal Maxamed Cumar
Cismaan ayaa dhambaal hanbalyo oo ku aaddana
munaasabada bisha barakaysan ee Ramadaan, u
diray CWXO, madaxda iyo masuuliyiinta JWXO,
xubnaha JWXO iyo guud ahaanba dadwaynaha
Ogaadeenya meel kastoo ay joogaan.
Guddoomiyuhu wuxuu dadwaynaha Ogaadeenya ku
bogaadiyay adkaysiga ay u yeesheen
dhibaatooyinka dabiiciga ah ee Abaaruhu ka
midka yihiin iyo tacaddiyada ee gumaysigu ku
hayo, wuxuuna Eebe uga rajeeyay inuu denbi
dhaaf iyo guul degdeg ah ugu abaalgudo.
Guddoomiyuhu wuxuu CWXO iyo dadwaynaha
Ogaadeenyaba ku boorriyay inay sii xoojiyaan
dagaalka xaqa ahee ay kula jiraan gumaysiga
Itoobiya, isla markaana ay xeelad iyo xoogba
kaga hortegaan shirqoollada uu cadowgu u
maleegayo iyo dabinnada uu u dhigayo.
Waxaa isaguna hanbalyo middan la mid ah CWXO
iyo dadwaynaha Ogaadeenya u diray
guddoomiyaha Xarunta Dhexe ee JWXO, kaasoo
dadwaynaha Ogaadeenya ku guubaabiyay inay
isku duubni iyo midtidnimo muujiyaan, isla
markaana sii xoojiyaan taageerada ay la
garab taagan yihiin CWXO ee xaq u-dirirka
ah. Guddoomiyuhu wuxuu dadwaynaha ugu baaqay
inay hal meel uga soo wada-jeestaan
gumaysiga Itoobiya iyo kuwa u adeega
labadaba.
Wuxuu kaloo dadwaynaha ku dhiirri galiyay
inay beesha caalamka u sheegaan
dhibaatooyinka uu gumaysigu ku hayo marka ay
u suuragasho ee dadyow caalamka ka socda ay
soo booqdaan gobollada Ogaadeenya, isagoo
tilmaamay in sidaasoo kaliya lagu ogaan karo
dhibaatooyinka iyo xadgudubyada sida
joogtada ah cadowgu ugu gaysanayo. Ugu
denbaytnii wuxuu u rajeeyay in Ilaahay ka
aqbalo Soonkooda, isla markaana guusha ka
siiyo cadowga Islaamka ee ay dagaalka kula
jiraan.
John Holmes oo Ogaadeenya booqanaya .
Madaxa Xafiiska Arrimaha Baniʼaadamnimada ee
Qaramada Midoobay John Holmes ayaa isniintii
gaadhay magaalada Addis Ababa, wuxuuna ilaa
iyo arbacada soo mari doonaa meelah ay
Abaaruhu ka jiraan oo Ogaadeenya ka mid
tahay.
John Holmes wuxuu tagayaa gobolka Shucuubta
Koonfureed oo ku yaalla Koonfurta Itoobiya
iyo Ogaadeenya, oo isu gayntooda ay ku
tabaalaysan yihiin in ka badan 8 milyan oo
qof, oo u baahan in cunto degdeg ah lala
gaadho.
John Holmes ayaa la kulmay masuuliyiin
Itoobiyaan ah, kuwaasoo uu kala xaajooday
sidii ay u fududayn lahaayeen in dadkaas la
gaadhsiiyo gargaarka ay u baahan yihiin.
Xukuumadda gumaysiga Itoobiya ayaa xayiraad
ku haysa Ogaadeenya in ka badan sannad,
iyadoo hayʼadaha gargaarka ah u diiday inay
wax taakulo ah gaadhsiiyaan gobollada
Ogaadeenya, isla markaana dadwaynaha ka
mamnuucday inay dhaqdhaqaaq ganacsi
sameeyaan.
Qaramada Midoobay ayaa bishii Juun codsatay
in loogu deeqo 325.2 milyan oo Doollar, si
ay kaalmo u gaadhsiiso dadka ku tabaalaysan
Ogaadeenya iyo Itoobiya oo dad gaadhaya 12
milyan oo qof ay gargaar degdeg ah u baahan
yihiin. Qaramada Midoobay ayaa sheegtay in
52% oo kaliya loogu yaboohay deeqdii ay
codsadeen.
Talyaaniga oo magdhaw siiyay Liibiya
Raʼiisal wasaaraha Waddanka Talyaaniga
Silvio Berlusconi ayaa dhammaadkii
toddobaadkii hore saxiixay heshiis ku
saabsan magdhaw waddanka Liibiya laga
siinayo gumaysashadii uu Talyaanigu
gumaystay. Heshiiskani wuxuu dhigayaa in
Liibiya magdhaw loo siiyo adduun dhan 5
bilyan oo Doollarka Maraykanka ah, wuxuuna
soo afjarayaa muran muddo dheer u dhexeeyay
labada waddan ee Liibiya iyo Talyaaniga oo
la xidhiidha dhibaatooyinkii uu Talyaanigu u
gaystay Liibiya xilligii uu gumaysanayay.
Berlusconi ayaa sheegay in magdhawgan, oo
Talyaanigu 25 sano gudohood ku bixin doono,
uu dhammaynayo is afgaran-waa 40 sano u
dhexeeyay labada waddan. Waxaa isaguna
heshiiskan ku tilmaamay inuu albaab cusub u
furaya xidhiidhka labada waddan hoggaamiyaha
Liibiya Mucamar Al Qadaafi.
Talyaanigu wuxuu xooga ku qabsaday waddanka
Liibiya sannadkii 1911, wuxuuna mustacmarad
hoos timaada u aqoonsaday sannadahii
soddomeeyadii, taasoo horseedaty dagaallo
badan oo dadwaynaha Liibiya ku doonayeen
inay dalkooda gumaysiga kaga xoreeyaan.
Waddanka Liibiya wuxuu Talyaaniga ka
xoroobay sannadkii 1951.
Waa markii ugu horraysay ee waddan Afrikaan
ahi uu magdhaw ka qaado dalkii horay u
gumaysan jiray, waxaana la is-waydiinayaa in
tallaabadan ay ku dayan doonaan wadammo kale
oo Afrikaan ah oo horay loo gumaystay.
02 September 2008
Axmed Gaal-Eri
Radio Xoriyo waxaad ka dhegaysan kartaa
Mawjadda 41 MB ee dhererkeedu yahay 9445
KHZ, iyo internetka http://Radioxoriyo.com
iyo http://Ogaden.com Maalinta Talaadada ah
7:00PM - 8:00PM waqtiga Afrikada Bari |
