Radio France Internation (RFI) oo xaalada Ogadeniya ka wareystey Axmed Gurxan

Wariyaha ayaa warka hordhaca ah sidan ku bilaabaya

« Weli Heeska Afrika ayaan ku jirnaaye, mushkiladda aan aad looga hadlin waa midda ogaadenya, gobolkan oo doonaya in uu ka go’o itoobiya, weerar baaxad leh oo ay soo  qaaday xukuumadda Addis bilihi u dambeeyey ayaa waxaa weheliya go’doomin ay gelisay gobolka oo idil taasoo ka hor istaagaysa hay’adaha gargaarka in ay shaqadooda  si xor ah u qabsadaan, xaaladaas oo ay markale dhaleecaynayaan  Mucaaradka ,ONLF oo ah ururka u doodda aaya ka talinta Ogadenya  ayaa wuxuuba sheegayaa macaluul ba’an oo ka jirta Ogaadenya waxayna dalbanayaan in loo furo shacabka  « Dariiq gargaar « Ahmed gurhan ayaa wareysigan ka qadnay

Su’aal :-maxaad u dalbateen in  waddo  gargaar loo furo Ogadenya xaaladduse sidey tahay hadda?

Jawaab :- Shacabka ogadenya wuxuu ku sugan yahay marxalad aad u qallafsan waxuuna ku jiraa go’doon buuxa ,dhamaan hay’adaha gargaarkana waa laga suuliyey Ogaadeenya , ayada oo ay ka  jirto dhamaan geeska Afrika  abaar ayaa cunaqabataynta Xukuumadda itoobiya ay ku soo rogtay  shacabka ogaadenya waxay gaarsiisay heer  aad iyo aad  halis u ah.

Su‘aal:- inteed ku qiyaasi kartaa dadka ay arrintani saamaysay ?

Jawaab:-Ayadoo cunaqabatayntu wada saamaysay dhamaan shacabka ogaadenya ayaa gobollada qaar ay ka sii xag jiraan oo dadka ku dhaqan Laba ilaa saddex malyan in ay ku sugan yihiin duruuf  culus , waxaan odhan karnaa in ka badan  50% dadka reer ogaadenya in xaalkoodu halis yahay.
waxaan  ugu baaqaynaa  bulshada caalamka in loo furo  „ Waddo Gargaar „ Ogaadenya si loo badbaadiyo shacabka ileen waxaa aan ka hadlayno waa badbaadin, haddii ay xaaladdu sidaas sii ahaatana  shacabku wuxuu ku socdaa inuu tirtirmo.

Waraysiga qaybta labaad

Hordhaca weriyaha

Jabhadda Waddaniga xoreynta Ogadenya  Waxay dalbanaysaa in loo furo Ogaadenyo „ Dariiq gargaar „(humanitarian corridor) si looga qaado shacabka culayska ay saaran shacabka ku dhaqan gobolkan deriska la ah Soomaaliya,gobolkan oo go’doonsan sanad ku dhowaad.
Kacdoonka hubaysan ee ka taagan Ogadenya ayaa ku kelifay Xukuumadda itoobiya in ay Gobolka oo dhan go’doomiso halkaas oo aanay ka shaqayn karin hay’adaha gargaarka iyo ururrada aan dawliga ahayn toona.

Su’aal :- Wax dagaallo ah ma ka jiraan hadda gobolka Ogaden ?

Jawaab :-Iska hor imaadyadu waa kuwo joogto ah oo maalin kasta dhaca , maadaama ay xukuumadda Itoobiya askarteeda ku soo daad guraysay Ogaadenya  ciidankeenuna meel kasta joogo  waqti kasta ayaa la isku dhacaa sidaas oo ay tahay waxaan diyaar u nahay sidi aan horayba u sheegnay in aan ku dhawaaqno XABBAD JOOJIN  si gargaar loogu fidiyo shacabkeena  oo ay hay’adaha gargaarka, Qaramada midoobay,iyo bulshada caalamkuba ugu soo gurmadaan dadkeena.

Su’aal :- Maxay tahay ujeedadiinu ama siyaasadiinu ku salaysan tahay ?

Jawaab :-  Waxaan nahay urur u dagaalamaya Xornimada ama aaya ka talinta Ogaadenya  sidaas oo ay tahay waxaan diyaar u nahay in aan miiska wadahadalka aan ku dhamaysano si xal loo helo, hase yeeshee xukuumada Itoobiya  sida muuqata waxay door biday siyaasad gurracan oo dab iyo bansiin ah taaso aan wax midho ah u dhalayn xukuumada itoobiya qudheeda, shacabka iyo gabolka oo dhan toona.


--Ogaden Online News