June 12, 2006 Wararka naga soo gaadhaya Jigjiga ayaa tibaaxaya in Sirdoonka Itoobiyaay qorteen dad tiro badan oo noocyo badan isugu jira, kuwaas oo ay ugu talogaleen in ay u soo jaajuusaan cidwalba oo ay uga shakiyaan inuu wado hawlo Jabhadda ONLF lagu taageerayo.
 
Jaajuusiintan oo qaybo badan isugu jira oo ay kamidyihiin dad da' yar ah sida; baalashlayaasha(kabo-caseeyaha), iyo kuwa qabta shaqooyinka xoogsiga ah sida biyo dhaaminta iyo darawalada tagaasida ayaa tiradoodu gaadhaysaa illaa 600(lix boqol).

Xog aanu ka helnay ilo ku dhaw-dhaw Sirdoonka Itoobiya ayaa noo caddeeyay in ay ku hanwaynyihiin in jaajuusintan cusub ay wax wayn ka tari doonaan helista xogaha ay u baahanyihiin. Laakiin dad khibrad u leh arimaha nabad-sugidda ayaa rajo xumo ka muujiyay faa'idada ay u keeni karto dawladda Itoobiya tallaabada caynkan oo kale ah, iyagoo sheegay in ay ku sababi karto jaha wareer iyo xogtooda oo aan noqonin mid xafidan.


Ogaden Online News